1. Lux una, Christe, méntibus
cum tu corúscas ánxiis,
error facéssit improbus,
sérena claret véritas.
2. Obvólvitur calígine
orbis tui expers lúminis;
fac una corda cópulet
fides et alma cáritas.
3. Te lingua quaevis pérsonet,
te ludus, artes, lítterae,
typísque cusa página
vagúmque te diárium.
4. Tuum canat praecónium,
subvécta quovis, ómnibus,
diffúsilem per aéthera,
vocális unda stírpibus.
5. Tuo coácta nómine,
triúmphet usque Ecclésia,
gentésque fac ut cóngreget
ad unitátis vínculum.
6. Aetérna, Jesu, Verítas,
qua dúcimur, qua vívimus,
Patri, tibi, Paráclito,
honor, potéstas, glória. Amen.