Te, Joseph, célebrent ágmina cælitum,
te cuncti résonent christíadum chori,
qui, clarus méritis, junctus es ínclitæ
casto foedere Vírgini.
Almo cum túmidam gérmine cóniugem
admírans, dúbio tángeris ánxius,
afflátu súperi Fláminis ángelus
concéptum púerum docet.
Tu natum Dóminum stringis, ad éxteras
Ægypti prófugum tu séqueris plagas;
amíssum Sólymis, quæris et ínvenis,
miscens gáudia flétibus.
Electos réliquos mors pia consecrat
palmámque eméritos glória súscipit:
tu vivens, súperis par, frúeris Deo,
mira sorte beátior.
Nobis, summa Trias, parce precántibus,
da Joseph méritis sídera scándere:
ut tandem líceat nos tibi pérpetim
gratum prómere cánticum. Amen.